GHAZAL
Jab se goya hui khamushi ki zabaN
bezabaN ho gai har kisi ki zabaN
dam-bakhud haiN ujaaley isi baat par
ek diya le udaa roushni ki zabaN
baat apni hi kehta hooN maiN dosto
mere muh mein nahi hai kisi ki zabaN
Us ke lehje meiN khushbu gulaboN ki hai
bolta hai koi meer ji ki zabaN
husne-guftaar bhi, husne-izhaar bhi
kis qadar hai haseeN shairi ki zabaN
us ke hosh o khirad dast-basta huye
jo samajhne laga,be-khudi ki zabaN
Eik Qause-quzaaH hai ye URDU Sukhan
rang- nairang ki, naghmagi ki zabaN
*************