سخی سیٹھ
اک دن اک وچاری مائی
وڈھے سیٹھ دی کوٹھی آئی
آکھن لگی کُڑی جوان ایں
میں آں بیوہ بُڈھڑی جان ایں
بھانڈے مانجاں کراں مجوری
روٹی دال سُیں ہُندی پوری
کڑُی نوں بُوہیوںِ کویں اُٹھاواں
پیسہ دھیلا کِتھوں لاواں
ڈُونگھی سوچیں ڈُبی ہوئی آں
غم دے کھوبے کھُبّی ہوئی آں
مدد کر کے بھار ونڈاؤ
اجر ثواب خدا توں پاؤ
اللہ تہانوں ہور وَدھاوے
کیتا دان نہ ورتھا جاوے
سیٹھ نے سُنیاں دُکھ دِیاں گلاں
سینے وجیاں گُجّھیاں سَلّاں
ہنجُو آ گئے اَکھاں اندر
جیوں چنگیاڑے ککھاں اندر
دُکھڑے سُن کے رہ نہ سکیا
ہاڑے ہو کے سہہ نہ سکیا
رب دے خوفوں کمبیا ڈریا
لماں سارا ہَوُکا بھریا
اوسے ویلے چابی کَڈھی
کھولی اِک تجوری وَڈّی
نوٹاں دے سَن تھئیاں تھبے
بَھرے بَھرائے خانے سبھے
سوچیا بُلھّ تے اَنگل دَھرکے
عینک ذرا کو اُچیّ کر کے
ویکھیا چاکھیا چار چوفیرا
کھچّیا فیر دراز وَڈیرا
کر کے جگرا بھر مردانہ
کَڈھ کے دتا وَڈّا آنہ
******
