پُلس نوں آکھاں رشوت خور تے فیدہ کی

پچھوں کردا پھراں ٹکور تے فیدہ کی

جھاڑو نال بناون مور تے فیدہ کی
بوتھی ہو جائے ہور دی ہور تے فیدہ کی

کولوں پان بناون چور تے فیدہ کی
پھڑ کے اندر دین دھسور تے فیدہ کی

اک سو نو وچ پھڑ دے نیں پھڑ دے رہن
ست اِکونجا جڑ دے نیں تے جڑ دے رہن

خلق دے پتّے جھڑ دے نیں تے جھڑ دے رہن
دیکھن والے سڑ دے نیں تے سڑ دے رہن

میں جے چیکاں پاواں شور تے فیدہ کی
پچھوں کردا پھراں ٹکور تے فیدہ کی

بساں لُٹیاں جاندیاں نیں تے صبر شکر
سنگھیاں گھٹیاں جاندیاں نیں تے صبر شکر

کُتیاں پُٹیاں جاندیاں نیں تے صبر شکر
عِزتاں لُٹیاں جاندیاں نیں تے صبر شکر

جے میں آکھ دیاں کجھُ ہور تے فیدہ کی
پچھوں کردا پھراں ٹکور تے فیدہ کی

کلی پُلس دے وچ ای رشوت خوری نئیں
کیڑا شعبہ اے جتھے ایہہ کمزوری نئیں

کیڑے مال گودامے ہندی چوری نئیں
کیڑے امبر سر وچ گنج دی موری نئیں

افسر جے نہ ورتن زور تے فیدہ کی
پُلس نوں آکھاں رشوت خور تے فیدہ کی

******