یہ جو ہم سر تیری چوکھٹ سے لگائے ہوئے ہیں
یہی سمجھو کہ زمانے کے ستائے ہوئے ہیں

ہم نے اس دل کو کہیں اور لگایا ہوا ہے
اور یہ ہاتھ کہیں اور اٹھائے ہوئے ہیں

تجھے دیکھوں تو مجھے یاد یہ کون آتا ہے
تُو نے یہ رنگ بھلا کس کے چرائے ہوئے ہیں

کارِ دنیا نے ہمیں مہلت یک خواب نہ دی
سو کہیں کھوئے ہوئے ہیں کہیں پائے ہوئے ہیں

کس لئے یاد دلاتے ہو ابھی رہنے دو
کیا ہوا، ہم جو کوئی بات بھُلائے ہوئے ہیں

ہم ہی گوش بر آواز نہیں تھے ورنہ
تم نے پہلے بھی یہ گیت سنائے ہوئے ہیں

ابرار احمد