کچھ کام نہیں ہے یہاں وحشت کے برابر
سو تم ہمیں غم دو کوئی ہمّت کے برابر
کب لگتا ہے جی راہ سہولت میں ہمیشہ
اور ملتا ہے کب رنج ، ضرورت کے برابر
آسایش و آرام ہو ، یا جاہ و حشم ہو
کیا چیز یہاں پر ہے محبّت کے برابر
گنجایش افسوس نکل آتی ہے ہر روز
مصروف نہیں رہتا ہوں فرصت کے برابر
بھر لاے ہیں ہم آنکھ میں رکھنے کو مقابل
اک خواب تمنا تیری غفلت کے برابر
رکھ دیں گے ترے پاؤں میں ہم موج میں آ کر
دنیا ہے کہاں جان کی قیمت کے برابر
پھر کشمکش سود و زیاں ،کار زیاں ہے
جب جیت بھی ٹھہری ہے ،ہزیمت کے برابر
جینے میں جو احساس تفاخرہے ،کہاں ہے
جیتے چلے جانے کی ندامت کے برابر
ابرار احمد