Ada Jafri

ghar ka rasta bhi mila tha shayad
rah mei.n sang-e-wafa tha shayad
is qadar tez hawa ke jhonke
shaKH par phul khila tha shayad
jis ki baato.n ke fasane likkhe
us ne to kuchh na kaha tha shayad
log be-mehr na hote honge
wahm sa dil ko hua tha shayad
tujh ko bhule to dua tak bhule
aur wahi waqt-e-dua tha shayad
KHun-e-dil mei.n to Duboya tha qalam
aur phir kuchh na likha tha shayad
dil ka jo rang hai ye rang ada
pahle aankho.n mei.n racha tha shayad

***************