KHud hijabo.n sa KHud jamal sa tha
dil ka aalam bhi be-misal sa tha
aks mera bhi aaino.n mei.n nahi.n
wo bhi kaifiyat-e-KHayal sa tha
dasht mei.n samne tha KHema-e-gul
duriyo.n mei.n ajab kamal sa tha
be-sabab to nahi.n tha aankho.n mei.n
ek mausam ki la-zawal sa tha
KHauf andhero.n ka Dar ujalo.n se
saneha tha to hasb-e-haal sa tha
kya qayamat hai hujla-e-jaan mei.n
us ke hote hue malal sa tha
jis ki jaanib ada nazar na uThi
haal us ka bhi mere haal sa tha

****************