غزل
اپنے ہونٹوں پہ کہاں اس نے کہانی رکھّی
بات جو کچھ بھی تھی پلکوں کی زبانی رکھّی
دل کی راہوں سے مری کون ابھی گزرا ہے
کس نے آنکھوں کے دریچوں میں نشانی رکھّی
پیاس جاگی تو میں قطرے کا طلب گار ہوا
اس نے ہونٹوں پہ سمندر کی روانی رکھّی
مدتوں بعد مری آنکھوں سے چھلکے آنسو
لہجۂ نو میں وہی بات پرانی رکھّی
جانے کب سے ہے تعاقب میں خزاں کا موسم
رت مگر میرے لیے کس نے سہانی رکھّی
رات آئی تو مجھے یاد نہ آیا کچھ بھی
صبح نے آکے دل و جاں میں گرانی رکھّی
کس نے عادل کے تخیل کو تہہ و بالا کیا
کس نے لفظوں میں نئی شکل معانی رکھّی
***************************
.JPG)
