جگانے آیا نہیں مجھ کو شورِ شہر ابھی
پڑی ہے راہگزر میں ہی میری لہر ابھی

یہ اور ہی کوئی عالم ہے بادوباراں کا
رواں ہے اپنی روانی میں میری نہر ابھی

پڑی ہے گردِ مہ و سال میرے شیشے پر
نشے میں خاک اُڑاتی ہے موجِ دہر ابھی

مرے نشاں سے ابھی رات کو گزرنا ہے
گزارنا ہے مرے دل نے پچھلا پہر ابھی

بلائے خاک ابھی نقش پر نہیں پہنچی
زمین پر مرا اپنا نہیں ہے شہر ابھی

بساطِ ارض و سما کو الٹ کے چھوڑے گا
نکلنے والا نہیں مجھ سے میرا زہر ابھی

ابھی تو شدتِ آغازِ مے فشانی ہے
انڈیلنا ہے یہ تیزاب آٹھ پہر ابھی

ملی ہوئی ہے کہیں اور ہی نگاہ نوید
گلی میں آگ جلاتا ہے پچھلا پہر ابھی
*****