rulvā ke mujh ko yaar gunahgār kar nahīñ 
āñkheñ haiñ tar to hoñ mirā dāman to tar nahīñ 
ummīd-e-vasl se bhī to sadma na kam huā 
kyā dard jā.egā jo davā kā asar nahīñ 
din ko bhī dāġh-e-dil kī na kam hogī raushnī 
ye lau hī aur hai ye charāġh-e-sahar nahīñ 
tanhā chaleñ haiñ ma.arka-e-ishq jhelne 
un kī taraf ḳhudā.ī hai koī idhar nahīñ 
ḳhālī safā.ī-qalb se behtar hai dāġh-e-ishq 
kyā aib hai ki jis ke muqābil hunar nahīñ 
qātil kī raah dekh le dam bhar na zahr khā 
ai dil qazā ko aane de be-maut mar nahīñ 
kyūñkar yahāñ na ek hī karvaT paḌā rahūñ 
hū kā maqām gor kī manzil hai ghar nahīñ 
ran-khan paḌeñge jab kahīñ dikhlā.egā vo shakl 
be-kisht-e-ḳhūñ huī ye muhim ho ke sar nahīñ 
āñkheñ jhapak rahī haiñ mirī barq-e-husn se 
pesh-e-nazar ho tum mujhe tāb-e-nazar nahīñ 
yaaro batāo kis taraf āñkheñ bichhā.ūñ maiñ 
us shoḳh kī kidhar ko hai aamad kidhar nahīñ 
banda-navāz sab haiñ rukū o sujūd meñ 
taa.at se ġhāfil aap kī koī bashar nahīñ 
pariyoñ ke paas jā.ūñ maiñ kyuuñ dil ko bechne 
saudā jo mol luuñ ye mujhe dard-e-sar nahīñ 
dard-e-firāq-e-yār se donoñ haiñ be-qarār 
qaabū meñ dil nahīñ mutahammil jigar nahīñ 
rāh-e-adam meñ saath rahegī tirī havas 
parvā nahīñ na ho jo koī ham-safar nahīñ 
ḳhalvat-sarā-e-yār meñ pahuñchegā kyā koī 
vo band-o-bast hai ki havā kā guzar nahīñ 
uThvā ke apnī bazm se dil ko mire na toḌ 
pahlū meñ de ke jā mujhe barbād kar nahīñ 
hastī kidhar hai ālam-e-arvāh hai kahāñ 
ġhaflat-zada huuñ mujh ko kahīñ kī ḳhabar nahīñ 
zanjīr utar ga.ī tirā dīvāna mar gayā 
sannāTā qaid-ḳhāne meñ hai shor-o-shar nahīñ 
chandrā ke mujh ko bole vo āḳhir jo shab huī 
faq ho gayā hai rañg kisī kā sahar nahīñ 
barpā hai hashr-o-nashr jo raftār-e-yār se 
ye kaun sā chalan hai qayāmat agar nahīñ 
durr-e-najaf to jism hai us nāznīn kā 
mū-e-najaf meñ baal paḌā hai kamar nahīñ 
dīdār kā lagā ke maiñ aayā huuñ aasrā 
ummīd-vār huuñ mujhe māyūs kar nahīñ 
yaaro sitam huā huī āḳhir shab-e-visāl 
siina 'sharaf' ye kuuT rahe haiñ gajar nahīñ 

888888888888888888888