gadā-e-daulat-e-dīdār-e-yār ham bhī haiñ
hameñ na bhūliyo ummīd-vār ham bhī haiñ
jo banda-parvar o zarra-navāz-e-yār ho tum
to ye bhī dhyān rahe ḳhāksār ham bhī haiñ
jagah do ham ko bhī rahne ko tuur par muusā
bashar haiñ banda-e-parvardigār ham bhī haiñ
hazār shukr qalam-band haiñ shahīdoñ meñ
zahe-sharaf ki tire jāñ-nisār ham bhī haiñ
pasand aa.ī hai parvānoñ kī jo betābī
idhar bhī dekh lo tum be-qarār ham bhī haiñ
tamām umr hamārī na aañkh jhapkegī
javān-e-ma.arka-e-intizār ham bhī haiñ
unhīñ kī bū se mo.attar dimāġh hai apnā
vo rashk-e-gul haiñ to bāġh-o-bahār ham bhī haiñ
lipaT hī jaao gale se hamāre ḳhalvat meñ
akele tum bhī ho is vaqt yaar ham bhī haiñ
jahāñ meñ the ruḳh-e-raushan ke tere parvāne
umīd-vār-e-charāġh-e-mazār ham bhī haiñ
kabhī na likhyo ishāra bhī ham ko chashmak kā
javāb likhne meñ jādū-nigār ham bhī haiñ
ḳhabar hai husn-parastoñ ko vo navāzeñge
hazār shukr ki ummīd-vār ham bhī haiñ
ġhubār din ko haiñ shab ko chaman meñ haiñ ḳhushbū
ajab do-rañgī-e-lail-o-nahār ham bhī haiñ
nishāna tākegā koī to dil pukāregā
kisī ke tiir ke qābil shikār ham bhī haiñ
bahār-e-gul meñ shahīdoñ kī rūheñ kahtī haiñ
'sharaf' miTe hue naqsh-o-nigār ham bhī haiñ
88888888