غزل

میں کہاں ہوں مجھے پتہ ہی نہیں
تو بھی عرصہ ہوا ملا ہی نہیں
چاروں سمتیں اداس بیٹھی ہیں
شہر میں جبکہ کچھ ہوا ہی نہیں
مسئلے مشترک ہیں ہم سب کے
مشترک کوئی رہنما ہی نہیں
جانے کیوں اس کو سوچتا ہوں میں
دسترس میں کبھی جو تھا ہی نہیں
اس سے انصاف کی امید فضول
حق و ناحق جسے پتہ ہی نہیں
دفعتاً غیر کہہ دیا اس نے
بات کرنے کو کچھ رہا ہی نہیں
فکر دنیا ذرا ادھر ہٹ جا
تو کہ اب میرا مسئلہ ہی نہیں
کوئی تعبیر سوچنا بے سود
خواب آنکھوں میں جب سجا ہی نہیں
جس پہ چل کر میں اس طرف جائوں
راستہ وہ ابھی بنا ہی نہیں
سوچ اک بحرِ بیکراں اشفاقؔ
سوچ کی کوئی انتہا ہی نہیں
،،،،،،،،،،،،،،،،،،،،،،،،،

احمد اشفاق
پوسٹ بکس نمبر۔4485
دوحہ ۔ قطر
رابطہ۔ 00974 55239649
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔