kal raat ik ajeeb paheli hui hawa
jaltay huay dioon ki saheli hui hawa
shiddat say haap haap kay murda si ho chuki
wehshat zada charagh say kheli hui hawa
palti to dastaan bhi paltay gi aik dum
wadi ki band samt dhakeli hui hawa
sab pat jharr chukay hain,diay bhi shikasta hain
raqs-o-junoon ki rut main akeli hui hawa
khirrki say aatay hi meray mathay ko chooti hay
us mehrbaan ki si hatheli hui hawa
*****