Zehano.n me.n Khayaal jal rahe hai.n,
socho.n ke alaav-se lage hai.n,

duniyaa kii girift me.n hai.n saaye,
ham apnaa vujuud Dhuu.NDhate hai.n,

ab bhuukh se ko_ii kyaa maregaa,
manDii me.n zamiir bik rahe hai.n,,

maazii me.n to sirf dil dukhate the,
is daur me.n zehan bhii dukhe hai.n,

sir kaaTate the kabhii shahan_shaah,
ab log zubaan kaaTate hai.n,

ham kaise chhu.Daaye.n shab se daaman,
din nikalaa to saaye chal pa.De hai.n,

laasho.n ke hujuum me.n bhii ha.Ns de.n,
ab aise bhii hausale kise hai.n.