Zami'n ko mai'n ne kabhi aasma'n na hone diya
Mata-e-khak ko yu'n rayega'n na hone diya

Sanam tarash ke phir us ki guftagu bhi suni
Ke mai'n ne sang ko bhi be zabaa'n na hone diya

Yeh raz kya hai ke arz-o-sama ke khalique ne
Kisi ko apne sewa jaaweda'n na hone diya

Tafooliyat mei'n hai insan mubtala ab tak
Kisi bhi daur ne us ko jawa'n na hone diya

Bahar ruk na saki mere rokne se "Nadim"
Magar chaman ko sapurde khaza'n na hone diya
	
					Editor "Funoon" 4, Maclode Raod,
					Lahore (Pakistan)