Labo.n pe narm tabassum rachaa ke dhul jaaye.N,
Khudaa kare mere aa.Nsuu kisii ke kaam aaye.N ,

jo ibtadaa-e-safar me.n diye bujhaa baiThe,
vo bad_nasiib kisii kaa suraaGh kyaa paaye.N 

talaash-e-husn kahaa.N le chalii Khudaa jaane,
umang thii ki faqat zindagii ko apnaaye.N ,

bulaa rahe hai.n ufaq par jo zard-ruu Tiile,
kaho to ham bhii fasaane ke raaz ho jaaye.N ,

na kar Khudaa ke liye baar-baar zikr-e-bahisht,
ham aasmaa.N kaa mukarrar fareb kyo.n khaaye.N ,

tamaam maikadaa sun_saan maigusaar udaas,
labo.n ko khol kar kuchh sochtii hai.n miinaaye.N .