غزل
ڈاکٹر احمد ندیم رفیع
نوعِ بشر کا نشاں دکھائی دیا ہے
دُور بہت اک مکاں دکھائی دیا ہے
آتشِ نمرود ہے کہ سرحدِ سینا
حدِ ّ اُفق پر دُھواں دکھائی دیا ہے
دُور بہت دُور اک چراغ کی لو میں
کنجِ غمِ رفتگاں دکھائی دیا ہے
دُھل گیا فطرت کا کُہنہ پیرہنِ خاک
اَبر ہٹا ، آسماں دکھائی دیا ہے
جب بھی تری چشمِ نیم بازمیں جھانکا
درد بھرا اک جہاں دکھائی دیا ہے
قلب وجگر میں بھی تیرے نقشِ کفِ پا
ہر کہیں تیرا نشاں دکھائی دیا ہے
زخمِ دلِ ناتواں کی خیر ! خُدایا
کوچۂِ چارہ گراں دکھائی دیا ہے
میری جبینِ نیاز خَم ہے، جہاں بھی
سنگِ درِ آستاں دکھائی دیا ہے
کوہِ گراں چیر کر اٹھائی نظر جب
پھر وہی کوہِ گراں دکھائی دیا ہے
دشتِ تمنّا میں طُمطراق سے آتا
روز نیا کارواں دکھائی دیا ہے
جل مرے جب رہروانِ شوقِ نظارا
تیرا حسیں سائباں دکھائی دیا ہے
جب بھی ہوئی روشنی سی راہگزر میں
جلتا کوئی آشیاں دکھائی دیا ہے
ڈاکٹر احمد ندیم رفیع
