|
* Zakhm ko phuul to sar sar ko sabaa kahte hai'n, *
Zakhm ko phuul to sar sar ko sabaa kahte hai'n,
Jaane kyaa daur hai kyaa log hai'n kyaa kahte hai'n,
Kyaa qayaamat hai ke jin ke liye ruk ruk ke chale,
Ab vahi log hame'n aabalaapaa kahte hai'n,
Koi batalaao ke ik umr kaa bichharhaa mahabuub ,
Ittefaaqan kahi'n mil jaaye to kyaa kahte hai'n,
Ye bhi andaaz-e-sukhan hai ke jafaa ko teri,
Ggamzaa-o-ishvaa-o-andaaz-o-adaa kahte hai'n,
Jab talak duur hai tuu teri parastish kar le'n,
Ham jise chhuu na sake'n us ko Khudaa kahte hai'n,
Kyaa ta`ajjub hai ke ham ahl-e-tamannaa ko `Faraaz`
Vo jo maharuum-e-tamannaa hai'n buraa kahte hai'n. |
|