Ye aalam shauq kaa dekhaa na jaaye, 
Vo but hai yaa Khudaa dekhaa na jaaye, 
Ye kin nazaro'n se tum ne aaj dekhaa ,
Ke teraa dekhanaa dekha naa jaaye ,
Hameshaa ke liye mujh se bichharh jaa ,
Ye manzar baarahaa dekhaa na jaaye, 
Ghalat hai jo sunaa par aazamaa kar, 
Tujhe ai baavafaa dekhaa na jaaye ,
Ye maharuumi nahi'n paas-e-vafaa hai ,
Koi tere sivaa dekhaa na jaaye, 
Yahi to aashnaa bante hai'n aaKhir,
Koi na aaashnaa dekhaa na jaaye,
`Faraz` apne sivaa hai kaun teraa, 
Tujhe tujh se judaa dekhaa na jaaye.