|
* KaThi’n hai raahguzar thoRhii duur saath chalo, *
KaThi’n hai raahguzar thoRhii duur saath chalo,
bahut kaRhaa hai safar thoRhii duur saath chaalo,
tamaam umr kahaa’n ko’ii saath detaa hai,
mai’n jaantaa huu’n magar thoRhii duur saath chalo,
nashe mei’n chuur huu’n mai’n bhii, tumhei’n bhii hosh nahii’n,
baRhaa mazaa ho agar, thoRhii duur saath chalo,
ye ek shab kii mulaaqaat bhii Ghaniimat hai,
kise hai kal kii Khabar, thoRhii duur saath chalo,
abhii to jaag rahe hai’n chiraaGh raaho’n ke,
abhii hai duur sahar thoRhii duur saath chalo,
tavaaf-e-manzil-e-jaanaa’n hamei’n bhii karnaa hai,
“Faraz” tum bhii agar thoRhii duur saath chalo.
(tavaaf-e-manzil-e-jaanaaN : circumabulation of the house of beloved)
|
|