نعت پاک

مرامِ خلقت ، مرادِ قدرت تمہاری ذیشان ذات آقاؐ
تمہی سزاوارِ آرزو ہو ، تمہی ہو اہلِ صفات آقاؐ

تمہاری رحمت کی برکتیں ہیں ، ہر اک زمیں پر ہر آسماں پر
تمہی ہو روح و روانِ ہستی، تمہارے دم سے ثبات آقاؐ

تمہارے خلقِ عظیم تر پر نثار ہے آبروئے گلشن
خزینۂ علم و گنجِ حکمت ، تمہاری ہر ایک بات آقاؐ

خدائے قدوس و لم یزل کے رسولؐ ہو تم حبیبؐ ہو تم
تمہاری خاطر تمام کچھ ہے ، تمہاری ہے کائنات آقاؐ

بہ حکم مہ کو دو نیم کرنا ، وہ سنگریزوں کا کلمہ پڑھنا
بہت معلّٰی ہیں مرتفع ہیں تمہارے یہ معجزات آقاؐ

تبرّکِ رشکِ قند اِدھر بھی ، تبسم دلنواز اِدھر بھی
کے بدلے دن کی صباحتوں میں مرے نصیبوں کی رات آقاؐ

بہ اہتمامِ خلوص و جذبہ ، ثنا کے کچھ پھول نذر کرنے
کھڑی ہے عاشیؔ سمن بداماں، اِدھر بھی ہو التفات آقاؐ

عائشہ بیگ عاشی

بشکریہ ’’عندلیبانِ طیبہ‘‘ مرتب: مشتاق دربھنگوی
……………………………………