* ab na wo geet na wo dost puraane waale *
ab na wo geet na wo dost puraane waale
ab khamoshi ke ye mausam nahi jaane waale
chhodkar mujhko gaye goongi si tanhaai me
mere ahsaas me wo shor machaane waale
umr bhar raahon me palakon ko bichhaya humne
mud ke ik baar to dekhen kabhi jaane waale
banke insaaf ke paikar jo tane baithe hain
wo to sab the kabhi qaatil ko bachaane waale
wasl ki aik bhi rekha to banaai hoti
mere hathon ke muqaddar ko banane waale
sari mahfil ko pata hai yahan haalat teri
kya milega tujhe ashkon ko chhupaane waale
ghar bhi koi yahan baaqi na jalaane ko bacha
kitne maayoos hain basti ko jalaane waale
tere chehre se hai zaahir tere jaane ka sabab
kuchh bhi kahne ki zaroorat nahi jaane waale
jo bhi bichhude hain wo kab laut ke aaye hain "sahaab"
jaane kyun zid pe ade hain ye bulaane waale
|