phir utaary ga wo aflaak sy khaak,
ley gaya qariya-e-khashaak sy khaak...

batn-e-insaaN sy bhi insaaN nikla,
goya takhleeq hui khaak sy khaak...

khaak sy saakh bani hay meri,
dar-haqeeqat hay meri saakh sy khaak...

paanioN ne to daboo hi dalaa,
par wafa kar gaei tairaak sy khaak...

aadmi bikhreN, farishty jal ja'aiN,
khaak sy raakh juRy, raakh sy khaak...

tan chupana to koi baat nahiN,
kya alag rehti hay poshaak sy khaak...

koi to TooT gya hay ooper,
kyuN barasny lagi aflaak sy khaak...

dhund ya dhool nazar aati hay,
aa lagi deeda-e-nam'naak sy khaak...

koi jab is ko nahiN gooNdh saka,
kaisy mansoob rahy chaak sy khaak...

apny jaisoN sy mila huN Akhtar,
kab juda hay khas-o-khashaak sy khaak...