پھر تارے کا وہ افلاک سے خاک
لے گیا قریہئِ خاشاک سے خاک

بطنِ انساں سے بھی انساں نکلا
گوہا تخلیق ہوئی خاک سے خاک

خاک سے ساکھ بنی ہے میری
در حقیقت ہے مری ساکھ سے خاک

پانیوں نے تو ڈبو ہی ڈالا
پر وفا کر گئی تیراک سے خاک

آدمی بکھریں فرشتے جل جائیں
خاک سے راکھ جڑے، راکھ سے خاک

تن چھپانا تو کوئی بات نہیں
کیا الگ رہتی ہے پوشاک سے خاک

کوئی تو ٹوٹ گیا ہے اوپر
کیوں برسنے لگی افلاک سے خاک

دھند یا دھول نظر آتی ہے
آ لگی دیدہئِ نمناک سے خاک

کوئی جب اس کو نہیں گوندھ سکا
کیسے منسوب رہے چاک سے خاک

اپنے جیسوں سے ملا ہوں اختر
کب جدا ہے خس و خاشاک سے خاک

شاعر: اختر عثمان