|
* Khushii ne mujh ko Thukraayaa hai ranj-o-Gham ne paalaa hai, *
Khushii ne mujh ko Thukraayaa hai ranj-o-Gham ne paalaa hai,
gulo.n ne beruKhii kii hai to kaa.NTo.n ne sambhaalaa hai ,
muhabbat me.n Khayaal-e-saahil-o-manzil hai naadaanii,
jo in raaho.n me.n luT jaaye vahii taqdiir vaalaa hai ,
charaaGhaa.N kar ke dil bahlaa rahe ho kyaa jahaa.N vaalo,
andheraa laakh raushan ho ujaalaa phir ujaalaa hai ,
kinaaro.n se mujhe ai naaKhudaa duur hii rakhnaa,
vahaa.N lekar chalo tuufaa.N jahaa.N se uThne vaalaa hai ,
nasheman hii ke luT jaane kaa Gham hotaa to kyaa Gham thaa,
yahaa.N to bechne vaalo.n ne gulashan bech Daalaa hai .
|
|