Abhii aur tez kar le sar-e-khanjar-e-adaa ko
mere Khuu'n kii hai zaruurat terii shoKhii-e-hinaa ko

tujhe kis nazar se dekhe ye nigaah-e-dardaagii’n
jo duaaye'n de rahii hai terii chashm-e-bevafaa ko

kahii’n rah gaii’n shaayad tere dil kii dhadakano’n mei’n
kabhii sun sake to sun le merii Khuunshidaa navaa ko

koii bolataa nahii’n hai mai’n pukaarataa rahaa huu’n
kabhii butkade mei’n but ko kabhii kaabe me’n Khudaa ko