Jinhe’n mai Dhuundhataa thaa aasmaano’n me zamiino mei'n
vo nikale mere zulmat-e-Khaanaa-e-dil ke makiino mei'n

mahiine vasl ke ghadiyo’n kii suurat udate jaate hai’n
magar ghadiyaa’n judaaii kii guzartii hai mahino mei'n

mujhe rokegaa too ai naakhudaa kyaa gharq hone se
ki jin ko Duubnaa hai Duub jaate hai safiino'n mei'n

jalaa saktii hai sham-e-kushtaa ko mauj-e-nafas un kii
ilaahii kyaa chhupaa hotaa hai ahal-e-dil ke siino mei'n

tamannaa dard-e-dil kii ho to kar Khidamat faqiiro’n kii
nahii miltaa ye gauhar baadashaaho’n ke Khaziino’n mei'n

muhabbat ke liye dil dhuundh koii Tuu Tanevaalaa
ye vo mai hai jise rakhate hai’n naazuk aabgiino’n mei'n

buraa samajhuu unhe mujh se to aisaa ho nahii’n saktaa
ki mai’n Khud bhii to huu "Iqbal" apane nuktaachiino’n mei'n