نعت

سیدنا رئوفنا صل علیٰ محمدٍؐ
سرور تاج رفعنا صل علیٰ محمدٍؐ

اے مہ اوج اصطفا آئینہ من ارتضیٰ
نور ظہور والضحیٰ صل علیٰ محمدٍؐ

ہادی مسلک ہدیٰ ہادم منزل غویٰ
خازنِ دولتِ ہدیٰ صل علیٰ محمدٍؐ

صادق قول باصفا درِّ یتیم قل کفیٰ
حامل وحی کبریا صل علیٰ محمدٍؐ

محرم سرّ ہل اَتیٰ واصل خلوتِ دنیٰ
حق نگرِ وما طغیٰ صل علیٰ محمدٍؐ

خلق عظیم تیری خو مامعین آبجو
لنت لہم تیری ثنا صل علیٰ محمدٍؐ

رحمت عالمیں تو ہے ختم مرسلیں تو ہے
صدر نشیں انبیا صل علیٰ محمدٍؐ

کرتے تھے تجھ پہ جو ستم ان پہ رہا ترا کرم
دیتا تھا ان کو تو دعا صل علیٰ محمدٍؐ

چرخ سے ہے کہیں بڑا ایسے زمیں کا مرتبہ
جس پہ ہو تیرا نقشِ پا صل علیٰ محمدٍؐ

دردِ جگر کا ماجرا کس سے کہوں ترے سوا
ہاتھ میں ہے تیرے شفا صل علیٰ محمدٍؐ

امت زار و بے نوا ڈھونڈتی ہے تجھے شہا
نار حجیم سے بچا صل علیٰ محمدٍؐ

یارو عزیزو و آشنا، پاس سے ہوگئے جدا
وقت برا جو آپڑا صل علیٰ محمدٍؐ

شرم گنہ سے زار ہوں خوار ہوں اشکبار ہوں
بگڑی ہوئی مری بنا صل علیٰ محمدٍؐ

ذات تیری رفیع ہے خلق کا تو شفیع ہے
قیدِ عذاب سے چھڑا صل علیٰ محمدٍؐ

ہو تیری مدحت و ثنا قوسؔ سے کس طرح ادا
کہتا ہے آپ خود خدا صل علیٰ محمدٍؐ

علامہ قوس حمزہ پوری

بشکریہ ’’صل علیٰ محمد‘‘ 	مرتب: مشتاق دربھنگوی
……………………………