* چمن میں لالہ و گل کا نکھار کتنی دیر *
غزل
چمن میں لالہ و گل کا نکھار کتنی دیر
روش روش پہ خرام بہار کتنی دیر
فلک پہ چاند ستاروں کی روشنی کب تک
زمیں پہ گردشِ لیل و نہار کتنی دیر
جو گلستاں میں لگاتے ہیں آگ ، وہ سوچیں
نظامِ آتش و برق و شرار کتنی دیر
کفن میں ظلِ الٰہی کو بھی تو دیکھا ہے
سروں میں جاہ و حشم کا خمار کتنی دیر
اُٹھاکے سر تو چلے ہو مگر یہ سوچا بھی
کہ سرفرازیٔ سرو و چنار کتنی دیر
یہ پیش و پس ، یہ تعاقب ، یہ ہائو ہو کب تک
رہِ حیات میں گرد و غبار کتنی دیر
اٹھو ، بھڑکنے کو اب شمعِ بزم ہے شبلی
تمہارے ہاتھ میں جیون ستار کتنی دیر
علقمہ شبلیؔ
89/5, Ripon Street
Shibli House Kolkata-700016
Phone: (033)65103844
بشکریہ ’’میر بھی ہم بھی‘‘ مرتب: مشتاق دربھنگوی
………………………
|