Kisne liya ye naam mera tham gayaa hooN maiN….
Aahat ye maut ki hai ise sun rahaa hooN maiN ….
 
Kaagaz kii hai ye kashti samandar me chal rahii
LehroN me beh na jaaye yahi sochtaa hooN maiN ….
 
Bikhraa hooN saath maiN bhi to, toota hai jab bhi tuu
Aye paikar-e-jamaal tera aainaa hooN maiN ….
 
Waaqif hooN zaat se main teri yaar isliye
Har baar pattharoN me tujhe dhoondhtaa hooN maiN ….
 
Anjaam-e-raah-e-sach ka silaa ye milaa mujhe
Hans kar kaha sabhi ne bada sarfiraa hooN maiN ….
 
Us roz baagbaaN ne ujaada tha khud chaman
Kab se isi khayaal se sehmaa huaa hooN maiN ….
 
Lehjaa to haaN zaroor mera talkh hai magar
BaateiN ye pur-asar hain ki kadwi dawaa hooN maiN ….
 
*************