ارشد مینانگری
میرے محبوب ہے محبت عید
عیش و عشرت نہ شان و شوکت عید
سونا چاندی نہ مال و دولت عید
نخت نہ تاج نہ حکومت عید
میرے محبوب ہے محبت عید
حسن ، پاکیزگی ، نفاست عید
مہکے احساس کی لطافت عید
مسکراتے گلوں کی رنگت عید
میرے محبوب ہے محبت عید
اس کے دل کو کوئی بھی غیر نہیں
اس کو ہرگز کسی سے بیر نہیں
اس کا پڑتا کسی پہ پیر نہیں
ساری انسانیت کی چاہت عید
میرے محبوب ہے محبت عید
دشمنوں کو معاف کرتی ہے
ہر کدورت کو صاف کرتی ہے
پیار کا اعتراف کرتی ہے
اطمینان و سکون و راحت عید
میرے محبوب ہے محبت عید
یہ امیر و غریب کا رشتہ
دل سے زیادہ قریب کا رشتہ
ایک سچے حبیب کا رشتہ
ارشدؔ ہم پر خدا کی رحمت عید
میرے محبوب ہے محبت عید
+++