* کیا کہئے جاں نوازیٔ پیکانِ یار کو *
غزل
٭……اصغر حسین اصغرؔ گونڈوی
کیا کہئے جاں نوازیٔ پیکانِ یار کو
سیراب کر دیا دل منّت گذار کو
جوشِ شباب و تشنۂ صہبا، ہجوم شوق
تعبیر یوں بھی کرتے ہیں فصلِ بہار کو
ہر ذرہ آئینہ ہے کسی کے جمال کا
یونہی نہ جانئے مرے مُشتِ غبار کو
تھی بوُئے دوست موجِ نسیمِ سحر کے ساتھ
یہ اور لے اُڑی مری مشتِ غبار کو
کچھ اور ہی فضا دلِ بے مُدّعا کی ہے
دیکھا ہے روزِ وصل و شب انتظار کو
اصغرؔ نشاطِ روح کا اِک کھِل گیا چمن
جُنبش ہوئی جو خامۂ رنگیں نگار کو
|