* Paas-e-adab mei’n josh-e-tamannaa liye hue *
Paas-e-adab mei’n josh-e-tamannaa liye hue
mai’n bhii huu’n ek hubaab mei’n dariyaa liye hue
rag-rag mei’n aur kuchh na rahaa juz Khayaal-e-dost
us shokh ko huu’n aaj saraapaa liye hue
saramaayaa-e-hayaat hai hirmaane-e-aashiqii
hai saath ek suurat-e-zebaa liye hue
josh-e-junuun mei’n chhuut gayaa aastaan-e-yaar
rote hain muu’nh mei’n daaman-e-saharaa liye hue
'Asghar' hujuum-e-dard-e-Gariibii mei’n uskii yaad
aaii hai ik tilismii tamannaa liye hue
|