Bandhay hue haatho'n se qafas khol rahaa hoo'n,
Udhnay ke lie aaj bhi par tol rahaa hoo'n,

Bebaak sukhanwar hoo'n zubaa'n khol rahaa hoo'n,
kuch bolnaa mushkil hai magar bol rahaa hoo'n,

Tujhse mere ghamkhaar na kahnaa padhe mujhko,
mai’n ashk hoo'n mitti mie’n kahi'n role rahaa hoo'n

Dekhaa na usi ne mujhe jis ke lie ik umr,
Haatho'n me uthaae hue kashkol rahaa hoo'n,

Mai tujh se meri dushmane jaa'n dosti karke,
khud apnay lie shahd mei'n sam ghol rahaa hoo'n,

Mai'n kaun hoo'n, kia hoo'n ke tajassus me azal se,
Har aik baras aik girah khol rahaa hoo'n,

Kia cheez pilaadi hai ke phir bhi sare mahfil,
Saaqi ki taraf haath kie dol rahaa hoo'n.

Mansoor hoo'n or jur’rate izhaar hai mujh mei'n,
Mai dar pe bhi dekhie’n sach bol rahaa hoo'n,

Tum qadr meri Misr kay bazaar se pucho,
Mai'n Usufe Kan-aan hoo'n anmol rahaa hoo'n.