Kabhi khuda tou kabhi nakhuda ki qaid mei.n hai.n
azal se ham issi jurm-o-saza ki qaid mei.n hai.n
jaha.n mei.n koi bhi aazad reh nahi sakta
shajar zamme.n ki tou panchi hawa ki qaid mei.n hai.n
kaha.n se ab koi ummeed ki kiran laye.n
ke ujale bhi ussi bewafa ki qaid mei.n hai.n
wou mere jurm-e-mohabbat ki baat karte hai.n
jou khud zameer ke mujrim ana ki qaid mei.n hai.n
jou teri aankh ne keh dee.n wo kaisi batei.n thee.n
samatei.n hai.n ke ab tak sada ki qaid mein hai.n
mohabbatei.n hai.n ke aankho.n se baat karti hai.n
magar wo hont ke ab tak haya ki qaid mei.n hai.n