Ik tum ke dil me.n dard kisii Ghair ke liye,
ik ham ke dard ban gaye Khud aap ke liye,

ham apane aashiyaane me.n tere mu.ntazir,
tum ti.nke chun rahe the kisii aur ke liye,

ham jaanate hai.n dil me.n tumhaare nahii.n hai.n ham,
jo Khat tumhaarii aa.Nkho.n me.n the ham ne pa.Dh liye,

Gham hai ke tuu ne luuT liyaa aitamaad ko,
ik daaGh de diye hai.n hame.n umr ke liye,

qaatil kii is adaa pe bhii qurbaan jaaye,
Khud de ke zahar aa.Nkho.n me.n aa.Nsuu bhii bhar liye,

thii kaun sii Khataa ke milii jis kii ye sazaa,
hamane to umr bhar tere nqash-e-qadam liye,

"Azra" ye maanaa bojh hai ab tujh pe zindagii,
par zindagii to terii nahii.n hai tere liye.