|
* Subh taa shaam sochtaa huuN main, *
Subh taa shaam sochtaa huuN main,
sau tere naam sochtaa huuN main,
ye jo ek taazah aag bhaRhkii hai,
is kaa anjaam sochtaa huuN mai’n,
saamne hai qalam bhii kaaGhaz bhii,
aur paiGhaam sochtaa huuN mai’n,
tujh se is dil kaa jo ta’alluq hai,
us kaa kuch naam sochtaa huuN mai’n,
aik shaam-e-firaaq Dhal bhii gayii,
phir bhii har shaam sochtaa huuN mai’n,
(shaam-e-firaaq : evening of loneliness)
kyaa sabab hai Gham-e-zamaana kaa!
laa zaraa jaam sochtaa huuN mai’n,
(Gham-e-zamaana : sufferings of the world)
ab ko’ii fikr hii nahiiN “Baqi”,
bas teraa naam sochtaa huuN mai’n.
|
|