|
* Kabhii yuu’n bhii aa merii aankh me ke merii nazar ko Khabar na ho *
Kabhii yuu’n bhii aa merii aankh me ke merii nazar ko Khabar na ho
mujhe ek raat navaaz de magar uske baad sahar na ho
vo badaa rahiim-o-kariim hai mujhe ye sifat bhii ataa kare
tujhe bhuulane kii duaa karuu’n to duaa me merii asar na ho
mere baazuo’n me’n thakii thakii , abhii mahav-e-Khvaab hai chaaNdanii
na uthe sitaaro’n kii paalakii, abhii aahato’n kaa guzar na ho
ye Gazal ki jaise hiran kii aankho’n me’n pichhalii raat kii chaandanii
na bujhe Kharaabe kii roshanii, kabhii becharaagh ye ghar na ho
vo firaaq ho yaa visaal ho, terii yaad mahakegii ek din
vo gulaab ban ke khilegaa kyaa, jo chiraagh ban ke jalaa na ho
kabhii dhuup de, kabhii badaliyaa’n, dil-o-jaan se dono qubuul hai’n
magar us nagar me na qaid kar jahaa’n zindagii kii havaa na ho
kabhii din kii dhuup me jhuum ke kabhii shab ke phuul ko chuum ke
yuu hii saath saath chale sadaa kabhii Khatm apanaa safar na ho
|
|