حمد

تو کہاں نہیں ہے یارب ترا جلوہ کو بہ کو ہے
تجھے جس طرف بھی دیکھوں مرے مولیٰ تو ہی تو ہے

ترا اک اشارہ پاکر ہوا یہ جہان قائم
ترے نام سے ہیں مولیٰ زمین آسمان قائم
یہ چٹک چٹک کے غنچے تری حمد کر رہے ہیں
کہ ہے بحر و بر پہ ہرسو تو ہی لامکان قائم

تو کہاں نہیں ہے یارب ترا جلوہ کو بہ کو ہے
تجھے جس طرف بھی دیکھوں مرے مولیٰ تو ہی تو ہے

یہ وسیع دشت و دریا ترا نام گنگنائیں
تری ذات کا ہیں پرتو یہ دھنک شفق فضائیں
یہ شجر یہ پھول پودے ترے حسن کا ہیں مظہر
ترا کلمہ پڑھ رہی ہیں یہی جھوم کر ہوائیں

تو کہاں نہیں ہے یارب ترا جلوہ کو بہ کو ہے
تجھے جس طرف بھی دیکھوں مرے مولیٰ تو ہی تو ہے

یہ تری عطا ہے مولیٰ کہ میں ہنستی بولتی ہوں
ترے رحم سے خدایا میں نظارے دیکھتی ہوں
کہ میں پیڑوں پر کھڑی ہوں مرے ہاتھ ہیں سلامت
کروں شکر کس طرح سے میں وہ لفظ ڈھونڈتی ہوں

تو کہاں نہیں ہے یارب ترا جلوہ کو بہ کو ہے
تجھے جس طرف بھی دیکھوں مرے مولیٰ تو ہی تو ہے

مرے ہر قدم پہ کی ہے مری تونے رہنمائی
دیا تو نے ہی سہارا کبھی میں جو لڑکھڑائی
رہِ حق دکھانے والے تری اس عطا کے صدقے
ترے دم سے چشمِ بینا مرے مولیٰ میں نے پائی

تو کہاں نہیں ہے یارب ترا جلوہ کو بہ کو ہے
تجھے جس طرف بھی دیکھوں مرے مولیٰ تو ہی تو ہے

بیگم عاصف اظہار علی

725, Street No-1, Greater Azar Enclave (W)
Aligarh-202002 (U.P)
Ph: 0571-2720599
بشکریہ ’’غزالانِ حرم‘‘ مرتب: مشتاق دربھنگوی
……………………………………