abru kaa tasawwur thaa shamsheer nazar aaii  
geysuu ka khayaal aaya zanjeer nazar aaii  
yaan fasl-e-bahaaraan ko taqreeb khazaan dekha    
tamheed kharaabii kii taameer nazar aaii  
ham apne hii haathon sey jaan apni ganwaa bethey    
jab maut key aaney mein taakheer nazar aaii  
sang-e-dar-e-jaanaan par kii naasiya fursaaii   
itnii ke muqarrar kii tahreer nazar aaii  
main mahw-e-tajallii hoon mujh ko to zamaaney mein    
har shakl mein teri hii tanveer nazar aaii  
kuch aur na baRh jaaye miya’aad aseeri kii  
kyoon mujh ko rihaaii kii tadbeer nazar aaii