غزل

٭……برج نارائن چکبست

اُڑا کر صحنِ گلشن سے، مٹا کر آشیاں میرا
مرے سائے کے پیچھے پھر رہا ہے باغباں میرا
مرے احباب پیش آتے ہیں مجھ سے بے وفائی سے
وفاداری میں شاید کر رہے ہیں امتحاں میرا
تہہ و بالا کیا ہے گردشِ اعمال نے مجھ کو
نہ دشمن ہے زمیں میری، نہ دشمن آسماں میرا
صفائے قلب سے اللہ رے، انسان کی عظمت
فرشتے چومتے ہیںآکے سنگِ آستاں میرا
یہ ماتم ہے مصوّر اُٹھ گیا گلزارِ قدرت کا
ہر اک طائر ، ہر اک برگ چمن ہے نو حہ خواں میرا
سفر میں زندگی کے سو گیا ہوں تھک کے منزل پر
اجل کے نام سے بدنام ہے خوابِ گراں میرا
اسیری میں زباں سے میری سُن کے رازِ آزادی
گریباں پھاڑ کر سر دُھن رہا ہے پاسباں میرا
الٰہی خیر ہو کیا سرگزشتِ دل سنائے گا
لرزتا ہے مری آنکھوں میں کیوں اشکِ رواں میرا
*****