کیہہ بے درداں دے سنگ یاری
روون اکّھیاں زار و زاری

سانوں گئے بے دردی چھڈ کے
سینے سانگ ہجر دی گڈ کے
جسموں جند لوں لے گئے کڈھ کے
ایہہ گل کر گئے ہین سیاری

کیہہ بے درداں دے سنگ یاری
روون اکّھیاں زار و زاری

بے درداں دا کیہہ بھرواسا
خوف نہیں دل اندر ماسا
چڑیاں موت، گواراں ہاسا
مگروں ہس ہس تاڑی ماری

کیہہ بے درداں دے سنگ یاری
روون اکّھیاں زار و زاری

آون کہہ گئے پھیر نہ آئے
آون دے سبھ قول بھلائے
میں بھلّی، بھُل نین لگائے
کیہے ملے سانوں ٹھگ بپاری

کیہہ بے درداں دے سنگ یاری
روون اکّھیاں زار و زاری

بلھے شاہ اِک سودا کیتا
کیتا زہر پیالہ پیتا
نہ کجھ نفع نہ ٹوٹا لیتا
درد دکھاں دی گٹھڑی بھاری

کیہہ بے درداں دے سنگ یاری
روون اکّھیاں زار و زاری

بُلھے شاہ