Mere qaabuu me'n na peharo'n dil-e-naashaad aayaa, 
Vo meraa bhuulane vaalaa jo mujhe yaad aayaa, 
Dil-e-viraan se raqibo'n ne muraaden paain,
Kaam kis kis ke meraa khirman-e-barbaad aayaa,
Lijiye suniye ab afasaanaa-e-furqat mujh se ,
Aap ne yaad dilaayaa to mujhe yaad aayaa, 
Di mu`azzin ne azaan vasl ki shab pichhale pahar,
Haaye kambakht ko kis vaqt khudaa yaad aayaa, 
Bazm me'n un ke sabhi kuchh hai magar "daag" nahi'n ,
Mujh ko vo khaanaa-kharaab aaj bahut yaad aayaa.