غزل

٭……نواب مرزا خاں داغؔ دہلوی

پھرے راہ سے وہ یہاں آتے آتے
اجل مر رہی تو کہاں آتے آتے
مجھے یاد کرنے سے یہ مُدّعا تھا
نکل جائے دم ، ہچکیاں آتے آتے
نہ جانا کہ دنیا سے جاتا ہے کوئی
بہت دیر کی، مہر باں آتے آتے
ابھی سِن ہی کیا ہے جو بے باکیاں ہوں
انہیں آئیں گی شوخیاں آتے آتے
چلے آتے ہیں دل میں ارمان لاکھوں
مکاں بھر گیا مہماں آتے آتے
سنانے کے قابل تھی جو بات ان کو
وہی رہ گئی درمیاں آتے آتے
نہیں کھیل اے داغؔ یاروں سے کہہ دو
کہ آتی ہے اردو زباں آتے آتے