* azmo himmat kee uthalo haath meN shamsheer ab *
azmo himmat kee uthalo haath meN shamsheer ab
tor do saari salaakhaiN kaat do zanjeer ab
kab talak minnat samaajat aastaane ghair par
koshishe baaham se badlo qaum kee taqdeer ab
jisne kuchle the sare takhreeb dushman ke kabhi
kho gaya aakhir kahaaN wo jauhare tameer ab
ae musawwir khaamae maazi se kheeNcho tum zara
haal ke maathe pe mustaqbil kee ik tasweer ab
jo bhi likhna hai likho bas pattharoN ke jism par
ret ke seene pe likkho mat koi tahreer ab
waaize shola bayaN se kahdo ye EHSAN tum
uqdae taqdeer kholegi nahiN taqreer ab
**** |