Ab vahii harf-e-junu'n sab kii zubaa'n Thaharii hai, 
Jo bhii chal niklii hai vo baat kaha'n Thaharii hai,

Aaj tak shaiKh ke ikaraam mei'n jo shay thii haraam, 
Ab vahii dushman-e-dii'n raahat-e-jaa'n Thaharii hai,

Hai Khabar garm ke phirtaa hai gurezaane naaseh, 
Guftaguu aaj sar-e-kuu-e-buta'n Thaharii hai,

Hai vahii aariz-e-lailaa vahii shiiria'n kaa dahan, 
Nigaah-e-shauq ghari bhar ko yahaa'n Thaharii hai,

Vasl kii shab thii to kis darjaa subak guzarii hai, 
Hijr kii shab hai to kyaa saKht gara'n guzarii hai,

Bikharii ek baar to haath aai kab mauj-e-shamiim, 
Dil se niklii hai to kab lab pe fuGaa'n Thaharii hai,

Dast-e-sayyaad bhii aajiz hai kaf-e-gulchii'n bhii, 
Buu-e-gul Thaharii na bul-bul kii zabaa'n Thaharii hai,

Aate aate yu'n hii dam bhar ko rukii hogii bahaar, 
Jaate jaate yu'n hii pal bhar ko Khizaa'n Thaharii hai,

Ham ne jo tarz-e-fuGhaan kii hai qafas mei'n ijaad, 
"Faiz" gulashan mei'n vo tarz-e-bayaa'n Thaharii hai.