Neend ke shahr ko jatay hai'n tou thak jatay hai'n
Khawb ka bojh uthatay hein tou thak jatay hein

Kis tarah palkei'n utha kar teri janib daykhei'n
Ham tou palko'n ko giratay hai'n tou thak jatay hai'n

Poochiye ham sey,dil o jaan hoay zakhmi jin kay
Aap tou teer chalatay hai'n tou thak jatay hai'n

Laut aaye ga musafir koi um'meed nahi
Is lye deep jalatay hai'n tou thak jatay hai'n

Un ki mahfil ki taraf kis tarah jaye'n ke yaha'n
Dhoop sey saaye mei'n aatay hai'n tou thak jatay hai'n

Ab kisi aur ufaq par hi chamakta hai woh chaand
khud sey yeh baat chupatay hai'n tou thak jatay hai'n

Tu ney kia bojh bana kar hamei'n bheja hai gulaab
Is ki khushbu ko bhi paatey hei'n tou thak jatay hei'n

Lay ke jaye'n jo kisi ko nahi manzil ki taraf
Raastay Lout ke aatay hei'n tou thak jatay hei'n

Yeh taghayur hai zamanay ka kah kaliyo'n ko Batool
Raaz e dil bhanwaray sunatay hei'n tou thak jatay hai'n