غزل

بے مثل کیوں کسی کو میں اس کے سوا کہوں
مخلوقِ کائنات کو کیسے خدا کہوں
بس ایک جیسے لوگ ہیں اس شہر میں تمام
کس کو بھلا کہوں یہاں کس کو بُرا کہوں
وہ آفتاب ہے تو یہ کرنیں اسی کی ہیں
پھر کیسے ذاتِ حق سے میں اُس کو جدا کہوں
مجھ سے بڑا ہے کون گنہگار شہر میں
یہ حق مجھے نہیں کہ کسی کو بُرا کہوں
دنیا تو اک پڑائو ہے منزل نہیں مگر
جو ناسمجھ ہیں اُن کو بتائو میں کیا کہوں
یہ مصلحت بھی کذب بیانی سے کم نہیں
کیا زرد موسموں کو بھی ساحر ہرا کہوں

فصیح احمد ساحر

71, A.P.C.Road, Raja Bazar
Kolkata-700009
Mob: 9748860704
بشکریہ ’’میر بھی ہم بھی‘‘	مرتب: مشتاق دربھنگوی
………………………