Kabhi na roney ki khud ko talqeen kar raha huN
meiN apney ashkoN ki aaj tadfeen kar raha huN
 
kabhi mohabbat ki bheek lagti hey naik naamee
kabhi yeh lagta hey apni toheen kar raha huN
 
mujhe bhi saaqi ab ehteaaj e saboo naheeN hey
lahoo sey apney he shaam rangeen kar raha huN
 
jo khawab daikhey thay meiN ney saarey bikhar gaey heiN
naye sirey sey ab apni tadveen kar raha huN
 
kisi ki khush qaamatee nigahoN meiN kya basi hey
tavaaf e sayyargaan o parveen kar raha huN
 
meiN khush naheeN huN to oar koi bhi khush rahey kyoN
udaas rah kar sabhi ko ghamgeen kar raha huN
 
Fazil Jamili