|
* Jabeen E shauq pe gard E malaal chaahti hai *
Jabeen E shauq pe gard E malaal chaahti hai
Meri hayaat, safar ka m’a'aal chaahti hai
MaiN vus’atoN ka talabgaar apne ishq mein huN
Woh meri zaat mein ek yerGhamaal chaahti hai
HamaiN pata hai K us mehrbaaN ki charaa-gari
Hamaare zakhmoN ka kab indmaal chaahti hai
Tumhare baad meri aankh zid pe aagayi hai
Wohi jamaal, wohi khadd O khaal chaahti hai
Hum us ke jabr ka Qissa tamaam chahte haiN
Aur uski teGh, hamaara zawaal chaahti hai
Tum is ko apne tasarruf meiN laarahe ho, magar
Yeh shairy hai! Zara dekh bhaal chaahti hai
******** |
|